kopi hitam

kopi  hitam pahit rasanya
enak diminum di hari siang
orang muda besar semangatnya
dengan ilmu harus diimbang

tungku dulu baru kayu
baru diberi si bunga api
ilmu dulu baru perilaku
baru didapat apa dicari

oi, diak kanduang

dibukak bungkuih lapek bugih
yo harum raso kalamak dimakan
Adiak kanduang usah manangih
sakik sanang samo ditangguangkan

pabilo matohari alah manguniang
tanda hari lah laruik sanjo
susah iduik jan dibaok rusiang
dijalani sajo dima tibonyo

lilik balilik aka baringin
malilik sampai ka batang rumbio
banyak mukasuik banyak nak ingin
elok diukua jo bayang-bayang kito

gunuang pangilun balirik-lirik
ujuangnyo sampai ka balai baru
nan iduik tak lapeh jo sakik
oi diak kanduang, usah co itu

nan laweh iyolah langik
nan dalam iyolah lawik
kini lapang isuak sampik
alah biaso tu mah deh Dik

nan marusuah di hati

galok malam sabana kalam
indak nampak lain jalan ditampuah
risau hati jikok harilah malam
maso depan diri sarato kaluarga nan marusuah

batang tabik di Payokumbuah
tampek mandi urang Suliki
manga hati indak tarusuah
kok lai ko sarugo nan mananti

etong dietong si buah saga
makin dietong banyak tatingga
kok dunia ko nan dikaja
sansaro badan manangguang sasa

kok iyo putiah si awan pagi
manga manduang nan banampakan
kok iyo putiah nan namonyo hati
manga hati muruang nan baturuikkan

Sarugo nan dicito

diuleh tali ka tangkai galuak
sumua dalam ainyo jauah
Bagadang malam tibolah batuak
nan hati tak habih tarusuah

kalikih jo buah cimangko
maha haragonyo di hari pakan
baa indak risau hati nanko
masa depan akhiraik nan dipikiakan

ka Padang Panjang lewat Birugo
bika si Mariana usah dilewatkan
mukasuik hati handak masuak sarugo
kok lai tacapai baruntuang badan

lubang japang di Gunuang Pangilun
alah ditimbun tanah batahun-tahun
nan syaraik tacapai alun lain balun
ka Nan Kuaso juo mamintak ampun

kisah si buyuang atuang

mandaki jalan ka puncak gunuang
handak maambiak si pucuak rumbio
ikolah carito si buyuang atuang
anak padang nan laraik juo

alah jaleh warna kain panjang
manga dirantang di elokan juo
alah jaleh hiduik indak ka sanang
manga rantau nan kadijalang juo

salaweh lapiak tabantang
baitu gambaran isi di dado
tiok ka makan dapeklah berang
nan paruik indak kanyang pulo

dietong-etong pasia saganggam
alun ka salasai agak saminggu
dietong-etong paruntuangan
alun saelok urang nantu

panjang jorannyo si urang Jurong
pai mamanciang ka sungai Rangau
Ka babaliak pulang, langkah lah tadorong
bia ditahan padiah hiduik di rantau

jelo bajelo ikua siamang
mamakiak-makiak di wakatu pagi
dibayang-bayangkan iduik bisa kasanang
supayo tahan badan jo badai mananti

Urang hiduik pasti ka mati
indak bisa mailak jo basalisih
taniaiak dek buyuang malamar si Siti
anak gadih sabalah nan elok manih

sajuak ainyo mandi di sarasah
ilang panek jo latiah taraso
manggegek badan malangkah
mangaretek bibia maucap kato

laweh sawit urang Duri
tanahnyo lunak indah babatu
Oi, Apak Siti nan baik budi
tarimolah badan denai  ka minantu

upiak manunggu

baa bana pahiknya mangkudu
kicok saketek bia taraso
latiah lah upiak dek manunggu
nan buyuang tak juo tibo

hati ka nan lain

kok iyo ai lawik asin
bia disaring ndak nyo tawa
kok iyo hati alah ka nan lain
untuang abih etongan sudah