mande manangih indak amuh baranti
anak kanduang bajalan maninggakan kampuang
mandeh kanduang sabalah mananti
denai pulang isuak kok lah jadi urang
bungo di taman ka diakarang
rancak dipandang jo dipatuik
deh mandeh nan denai sayang
bia denai bajalan mancari hiduik
ambiak taruang ka diuokkan
lunak saparo capek diangkekkan
bialah pahik hiduik denai rasokan
nak tahu pulo jo untuang badan
di muko rumah batanam taruang
buliah dibaok ka pakan Kampuang Balam
sananglah mandeh di kampuang
rantau diganggam pambangkik batang tarandam
jo dadak ayam diagiah makan
talua nan sapuluh nan diaramkan
rindu ka mandeh tak takatokan
jo aia mato denai lapehkan
babaju hijau anak rang Pakan
umbai-umbai merah di tapi-tapinyo
kok jaso mandeh kadikanakan
bapasiang diri tak bisa juo ka mambalehnyo
dingin udaro malam taraso
nan manuang alun lai sampai juo
mandeh kanduang nan jauh di mato
handak dicium talapak kaki tampek sarugo
baok silamak di ateh baki
saratokan juo siriah di carano
bilo badan ka bisa jadi anak babakti
hari kahari sibuk mancari duni nan fana ko
bajalan lah buyuang tak babilang kilo
mambaok untuang badan jo hati sasa
dari ketek denai mandeh gadangkan jo aia mato
siang malam mancarikan makan jo biaya sikola
lenggang melenggok si layang-layang
manampik tandan diantak buruang
oi mandeh kanduang nan denai sayang
kok bulih pintak jo pinto Allahurobbi, bukankan pintu sarugo ka mandeh kanduang
usah disabuik badan nan seso
alah tasurek sagalo nan rugi sagalo nan baruntuang
Tuhan nan Mahakuaso
Sampaikan sambah sujuik diri nan hino ka mandeh kanduang
takuruang kunang-kunang di dalam boto
ditangkok anak dari daun nan ijau
duduak mandeh jo ai mato
taragak jo anak nan jauh di rantau
badan mandeh lah batam ringkih
umua nan tingga satangah hari
hati mandeh batambah risih
bilo ko nak kanduang ja manjalang lai
mandaki jalan ka Kelok Sembilan
sampai di ateh elok baranti malapeh litak
anak nan dulu ditimang dibuai dendangkan
kini lah lupo jo mandeh nan diseso rindu taragak
tinggalah rantau den ka pulang kampuang
di taluak bayu kapa nan balabuahkan
tunggulah denai mandeh kanduang
badan diri ka panabuih jaso manggadangkan
Tidak ada komentar:
Posting Komentar